1428. 77 den etc. Ich tu uch zu wissen, das die katzer nicht ferne von Glatz legen vnd seint zu Hawelsswerder 1) vnd haben daselbst den turm vndergraben vnd haben den gewonnen, vnd sy haben nicht grosse macht, also das sy wol weren nyderzulegen, vnd ich die fursten vnd land vnd stete besand habe, vnd nymandir vff sein wil ; dornoch habt euch zurichten. Vnd habe euch deste bas in warnunge, vnd was ich dirfare, das wil ich euch entpiten. Auch, lieben herrn, hat mir ein warhafftiger man in eyner heymlichkeit gesait, das di lande zu euch auch zu dem lande zur Slezien benümpt seint vmb sulchir sachin etc. Gebin zur Swidnitz an sante Thomas tage des h. zwelfboten. Postscriptum: Auch, lieben hh., es haben die von Glatz 40 vorretir in der stat gefan- gen vnd die eyn teil lange der herren bothen vnd diner seint gewest, die sulden die stat angestossen haben, vnd der züchtiger von der Swidnitz leit itzunder 14 tage do zu Glatz vnd vorterpt si von tage zu tage. Vnd sy fohen ir noch vmmerdar mer, dorumme sehet euch wol für vor vorreteniss. (1428) December 26. Albrecht von Kolditz an die Sechsstädte. Scultetus ann. Gorlicens. II. 78 b. Etc. Hannus von Polentz, voyt zu Niderlusitz, landvoyt zu Myssin: an die sechs land vnd stete etc., so wil ich, ob Got wil, vff desin nestkommen dornstag zu Myssin sien, by mynem h. von Sachsen, vnd meyne do zu harren, biss vff den suntag nestkommen. Vnd wil denn fort ryten zu mynem h. dem marggraffen von Brandinburg. Vnd wil dy sachen zu eyme gantzin ende nach allir redelichkeit wssrichten und bitte euch, wenn h. Hanns von Hoeberg kummit mit der botschafft vss der Slesien, das ir myr di ane sümen sendit kegin Senfftinberg, da wil ich bestellen, das sy mir nachkommen sol etc. Auch so thun ich euch wissin, das sich dy kätzer samlet zu Kosterlitz. So had den Procop dy landlüte vnd dy stete zu Behemen alle vorbott vff eyn tag, vff den nawen Jarstag kegin dem Behmischen Brode, vnd wy sy sich da scheiden, das wird mir auch zu wissin werden. Vnd weis anders nicht, denn das sy nach dem tage herws in das land zihen werden. Darumb so bete ich uch, das ir uch dornach schicket vnd euwir ding noch redelichkeit vnd ewrin bestin bestellit etc. Sunderlichen so düncket mich gut, ir werdet eyne, ir lande vnd stete, wenn myns h. von Sachsen rete vnd mynes h. von Brandinburg kegin Budissin vnd kegin Gorlitz komen, das man dy vs den herbergen löse etc. Auch sollit ir wissin, das ich suchir genüge, dy ich vmme ewern willen thu, vff tagen vnd auch in mynem eygen huse etc., vnd wenne ich uch hofelüte gebrocht habe adir noch brengin werde, dy mus ich eyne nacht hobin zu Lobin, die andir zu Senfftinberg, vnd also selbist wedir heym etc. Rite ich vff die tage, vnd habe nymmer mynre denne 26 adir 30 pherde, dy muss ich habin von euwer fynde wegen. Achtit ir wol, was mich solche zerungen gekosten mag. Meyne ich, das dass sechs land vnd stett bas getragen mögin, denn ich alleyne. Gegeben zu Dresden am suntage nach nativ. Christi. Dec. 30. 1429 Jan. 2. 1429 Jan. 1. 107. 1) Habelschwert.