106 646. 1430, Febr. 7b (Nürnberg). Derselbe an die von Hall: Kriegsnachrichten: die Hussen haben mit den von Bamberg sich abgefunden, liegen jetzt um Holfeld herum und wollen weiter gen Nürnberg rücken: Bitte um Beistand oc. (Nurnberger Missiv-Buch VIII, fol. 230.) Den von Hali. L. Fr. Als Ir vns verschriben vnd gebetten habt, ewer weisheit von der vnglewbigen Hussen gelegenheit vnd handel zuuerschreiben oc. das haben wir wol vernomen. Nu als Ir in ewerm brief etlicher maszen berürt, also haben sie nach dem vnd sie awsz dem Lande zu Meichsen komen seyn, dem Herren von Plawen vnd in vnserr gnedigen Herren.. des Marggrafen von Brandemburg vnd ... des Bischofen von Bamberg Landen laider merklich scheden getan, etliche stett vnd sloss gewunnen, so haben sich etlich derselben stette vnd sloss mit In gesetzt. Auch haben wir verstanden, daz sich des Stifts zu Bamberg stett vnd slosse vnd was dartczu gehört, auch mit In gesetzt haben. So ligen sie nu mit iren wagenbürgen vnd greysigen zewg vnd mit irer macht zu Holuelt vnd daselbst vmb. Vnd komen vns vil merklicher warnung vnd botschaft, daz sie ye in die gegend vnd genêhe vmb vns meynen zu komen, Land vnd Lewte daselbst auch zu verheren vnd zu verderben oder verrner zu rucken ob sie mugen. Darumb bitten wir ewr frewntschaft mit ganczem fleisz, dasz Ir ewerm greysigen zewg den Ir mit- sampt andern stetten vnsern guten freunden awszgesandt habt, die yeczunt bey vns seyn, gönnen vnd verschreiben wellet bey vns zubeleiben, als wir des ander ewr vnd vnser gut freund von den stetten auch gebetten vnd auch ganczem getrawen zu Irer vnd ewer weisheit haben, vns des niht zuverczeihen, auf einen zymlichen erbern solde, den wir In geben wellen, die weil sie also bey vns seyn. Das wellen oc. Wir haben auch mit ewern vnd andern stett dienern, die bey vns seyn, desgleichen auch geredt vnd gebetten. Datum ut supra (feria III post Do- rothee virginis).