13 Zum ersten: der her konig, als er altzeit begeret hat, also begert er fleissiclichen und unveruclichen fridsamkeit des reiches und der Cron zu Behem, das icht dasselbe reiche und Cron forder forterbet wurde und dieselben vorderbnusse und blut vorgyssunge, die leider bißher gescheen seind und gescheen, aufhoren und mocht wider in den vorigen wesen ge- bracht werden, als vor gewest ist. Und als ir vor ofte begert habt und dergabt euch einer vorhorunge, das dunket die gnade des hern konigs nit eben, das ir stundt allein nach sulcher vorhorunge und euch selbs ons den andern, beweiste besunder dy gnade des hern konigs rete, das ir liber daruber begerte ader heyschte ein erkentnusse des Concily ader sammunge der gantzen gemein der Cristenhait, das gescheen sol in kunfftigen zeiten, wenn des not geschicht, und darzu wil die gnade des hern konigs allen seinen fleis fugen und sich muen, das dy Cron mocht wider erhohet werden, und sein gnad hoffet von gutikeit gotes, des hern, das er is darzu bringen wirdert, das die Cron von allen iren vorbeynungen gereyniget wirdet und mit der hilff gotes wider geeret ader gewirdigt werde, als sie vor geeret und gewirdiget ist ader mehr. Item, von den sichern gleyten zu demselben Concilium wil die gnad des hern kunigs selbs kenwertlich is, das got, der herr, geben wird, reyten und vor hinfur machtboten senden und mit allem fleis sich muen, das er euch frey, sichere und notturfftige gleit schicken mocht, das ir mochte mit ewrn bristern, meistern, freien, rittern und knechten und ander, die ir mainte mit euch zu nemen, dohin sicher und unvorferunge leibes und gutes kumen und sunderlichen gote hern, dem almechtigen, ab got, der herre, das geb, das sie in einickait ader uber eintrechtig würden, besunder, ab sie aldo uberein eintrechtige nicht mochten werden, das sie dann mechten weyder in ir wonunge keren und reyten also sicher, als sie dann komen werden. Item, dy gnade hern konigs begert auf das, das fridsamkeit sey der Cron des reichs zu Behem und mit allen an dem taile des kunigs und sein undertanen bis zu demselben Concilium und darnach, ab sie sich in dem Concilio nicht einen und eintrechtigkeit mocht werden, das darnach ein halb jar nacheinander ein tail das andere nicht zwinge ader noten, noch nit laidigen soll. Item, ab der almechtig got, der herr, von sein gnaden und gabe uns verlihe sein einung und eintrechtigkait, so wol der her, der kunigk, vorlassen allen, die wider sein gnade getan haben und also sein gnad und sein untertanen und die umb sein willen tun und tun wolten, kein grennge ader zorn wider sie in zukunfftigkeit mit halden sullen. Kopialbuch, Fol. 51b—52a. (Nicht bei Palacký.) 80. 1431. Juni 12. Türschenreut. Abt Niklas von Waldsassen berichtet dem Egerer Rat, daß sich das Gerücht von einem Einfall der Hussiten über die Landesgrenze nicht bewahrheite.