Friderich und Hanns und Albrecht von Hockenborn den ersamen und wysen lüthen, burgermeister und radman, den landen und der stat Gorlitz unsern et cetera. Wir danken uch als unsern fründen und nackbern, das yr schribende und bittende syd gewest herzoge Hannse, das wir mit ym vor land und stete wolden syen kommen, da wir nemen und thun wolden noch unsern schulden, bryffen und wissen, was man derkannte et cetera. Weys man wol, das unser vater, den got gnade, Prebus an uns geherbit hot, und wir das von eym Römischen und Behemischen konige in lehenen habint, als von unserm rechten erbherren. Duchtet uns, das wir noch sulchen bryffen und wissen, dy die lehen anlangen, unmögelichen anderswo tage suchen, denn vor unserm gnedigsten herren dem Römische et cetera ader vor seynen rethen ader vor seinen voyten, landen und steten et cetera. Nu uns das nicht mag geschen, so müsse wir unser gerechtikeit vor unserm erbherren et cetera. Gegebin den nestin sunabind noch quasimodogeniti.