Den von Eger et cetera

Unsern freuntlichen dinst mit aller beheglicheit czuvor. Erbern, weisen, besunder lieben freunde! Ewr gutwillikeit, die ir czu uns habt, und ewrer verschreibung, die ir uns getan habt, wie es die kurfursten ieczund miteinander gelassen haben, dancken wir euch mit ganczem fleisse und lassen euch wissen, daz wir den Niclas Rosler, unsern eytgenossen und mitpurger, czü unserm gnedigen heren, dem künige, gesandt haben und der ist ieczo an der nehstvergangen mitwochen von seinen gnaden komen, und hat in in Merhern gelassen vor Ostraw in dem velde, und die Unger süllen kurtzlich czü seinem gnaden mit grossen volke und mit püchsen und anderm gereten komen. Auch hat sein gnaden, der herczog von Osterreich, verbotschaft, daz er schyer mit seinem volk auch zü im in daz velde komen, und unsers herren gnade meynt, daz er es in Merhern wölle flihten, und wolle sich dann heraus machen gen Regenspurg czü dem tage, der von den kurfursten is dahin gelegt worden.

Auch hat uns unser eytgenoss gesagt, das unsers herren volk: Ungern, Jassen, die mit seinen gnaden czu velde ligen, ein rennen mit den von Ostraw gemacht hetten, also daz sie der von Ostraw vil zü tod slugen und etlich in das wasser sprungen und ertruncken, daz man meynt, daz derselben veinde wol hündert erslagen und ertrunken sein, und daz hat einer von Ostraw gesagt, den sie in das here gefangen hetten.

Jeczund wissen wir auch nicht anders czü schreiben, daz nucz und trostlich wer, sunder gibt der almehtig got ichts daz sol unverschwigen bleiben. Czu Brux, an sant Philipp und Jacobi tag.

Burgermeister und rate der stat czu Brüx.

Und euch solt der brief vor langest worden sein und wir hetten den unsern mitburger einen geben, der heraus czu euch wolt sein geritten und ist daheim bliben, das es sich von des wegen also hat verczogen. Auch haben die unsern von dem lantfride in Pilsner kreis und andern aygentlich vernomen, ob die unsern nicht hinein czü in wern komen, so wer es mit demselben lantfrid und stetten Pilsner, Tachawer und Miser kreisses gen den hussen czu fride komen, und daz wer dann unser und ander dewtschen landen gros scheden gewesen et cetera.