Als ir uns vorschriben habt, wie ir worhafftiglich gewarnet seit, das die kätzer die Zittaw meinen zu obirzihen, und begert von uns mit macht euch zu hülffe zu kommen et cetera, des thun wir euch wissen, das wir teglich auch sulche warnende botschafft haben, das sie uns zu obirzihen meinen, und alreit obirzogen, und das closter Grissaw zu nichte gemacht habin. Doruff wir tegelich auch in schickunge stehen en zu wedir stehin. Sunder ab das würde, do got vor sey, das sie euch obirzögen, so balde uns daz zu wissen wird, so wir dozu gerne thun wöllin nach unserm mögen. Und getrauen euch, ein sulchs uns auch zu irzeigen. Gegeben am sunobend nehst vor fasznacht zu Jawer, under der stat secrect anno et cetera.

Jorge Zetheritz ritter und houptman, man und stete der furstenthum Sweidnitz und Jawor den erbarn, gestrengen, woltochtigen und weisen et cetera rittern, knechten, manschafftin, bürgermeistern und ratmann der stete Budissen, Gorlitz und Zittaw, unsern besondern liben vördern.