Der von Wirsberg wochenmarkct.

Wir Fridrich von gotes gnaden et cetera ekennen et cetera, wann wir angesehen vnd erkant haben sulch verdurplich scheden, so dann vnser liebe getrewen burgermeister rat vnd gemein vnsers marckts zu Wirsbergk von den hussen emphangen haben. Darvmb vnd auch von besundern gnaden, das sie den egenanten marckt Wirsbergk mit graben vns andern gepewen vnd beuestigunge dester ee vnd baß bevestigen vnd auffkomen mügen, haben wir denselben burgermeistern rat vnd gemein zu Wirßbergk vnd iren nachkomen gegünnet vnd erlaubet, geben günnen vnd erlauben in krafft dicz brieffs, das sie nu fürbaß einen frayen wochenmarckt wochenlichen allczeitt auff den sambstag haben sullen den zuhaben zugeniessen vnd zugebrauchen als dann ander wochen merkt in unsern steten vnd merckten reht gewonheit vnd herkomen ist. Des zu vrkund geben wir in disen brieff mit vnserm anhangenden insigel versigelt. Datum Onolczbach am mittwochen nach inuocauit anno et cetera xxxii. Dominus pro se.