Nos Sigismundus Claricz, iudex, Andreas Nersichgern, magister civium, Wenceslaus Snokaws, Nicolaus Robnhaup, Henslinus pannifex, petrus hofleich, petrus vogel, Michael Twaroze, nicolaus piper ceterique iurati cives in Budweis notum facimus universis, quod constitutus coram nobis honestus Nicolaus heller pannifex recongnovit et fassus est bona sua voluntate parique uxoris sue omniumque heredum et amicorum suorum consilio et assensu, super domo sua, iuxta balneum Wankonis et domo Dubiczeri sita et locata, mediam sexagenam grossorum pragensis monete census sive pensionis perpetuis temporibus per eum vel domo et aree possessorem dandam et solvendam pro pannis pauperum pro remedio animarum Nicolai dicti Buriani et predecessorum eius in quadragesima dividendis et ad manus scabinorum, qui pro nunc sunt vel pro tempore fuerint, pro quinque sexagenis grossorum se rite, libere ac legitime vendidisse, quemquid censum sive pensionem promisit prefatus Nicolaus et bona sua fide promittit annis singulis in medio quadragesime indivisim persolvere et finaliter expedire. Si vero prefatus Nicolaus vel domus et aree possessor unum quemque censum in termino dandi et indivise ad plenum non persolveret, tunc prefati scabini licite debebunt dictum censum in termino dandi neglectum statim die altera post dicti termini lapsum super dictum domum in dampna dicti Nicolai vel domus posessorem inter Iudeos conquirere sive christianos, hominis cuiuspiam contradictione aliqua non obstante. Si vero presens litera vel aliud pignus quodcumque per dictos scabinos ob non solutionem census prefati in Iudeis obligatum aput eosdem per unum mensem integrum continuaverit, tunc ipsi scabini, qui pro tempore fuerint, transmisso civitatis nostre nunccio, prefatum Nicolaum vel domus et aree possessorem inpignerare poterint licite et debebunt, sibi equos, vaccas aut quascumque alias res mobiles ibidem repertas recipiendo et ea pignera recepta in Iudeis obligare, pignera sua obligata penitus redimendo. Licebit autem prefato Nicolao vel domus et aree possessori, quandocumque premissas capitales habuerit pecunias, alium censum huic similem et eque certum in bonis civitatis nostre reemere, domum suam libertando. In cuius rei testimonium sigillum maius civitatis nostre presentibus duximus appendendum. Datum anno domini millesimo quadringentesimo vicesimo quarto in Translatione sancti Wenceslai.