Nos magister civium, consules et scabini Mai. Civ. Pr. huius scripti serie cunctis publice innotescentes protestamur, quod considerantes grata et utilia servicia providi Johannis Bechinie, concivis nostri, que nobis et communitati nostre in causis necessariis et arduis profectum civitatis nostre augentibus a temporibus nonnullis fideliter et caritative exhibuit, nunc exhibet exhibereque eo melius poterit in futurum, non per errorem aut improvide, sed de certa omnium nostrum sciencia et unanimi et voluntate totius communitatis nostre, deputavimus et proscripsimus prefato Johanni Bechinie sexaginta sexagenas grossorum in et super domo olim Johannis Rudolfi, sita inter domos olim Johannis Czelny ex una et Peyerlikonis parte ab altera. Que quidem domus post fugam et recessum prefati Johannis Rudolfi in bernis et collectis retentis, expedicionibus, vigiliis ac aliis oneracionibus civilibus, que de prefata domo solvi et exhiberi civitati nostre debuerunt, est iuridice ad nos et civitatem nostram devoluta. Quam devolucionem sic stante modo predicto prefato Johanni Bechinie iam dictas sexaginta sexagenas grossorum proscripsimus et realiter assignavimus, sic videlicet, ut eandem domum cum ipsius totali area et pertinenciis haberet, teneret, utifrueret et gauderet, quousque sibi prefate sexaginta sexagene grossorum una cum omnibus impensis super reformationem eiusdem domus expositis ac eciam super vigilias, bernas, collectas, expediciones ac alias aggravaciones civiles tempore intermedio factis non fuerint plenarie et integre date, explete et persolute, dantes sepe dicto Johanni plenam et omnimodam potestatem, ut prefatam domum in eodem iure, quo solus tenet, posset vendere et obligare sine omni impedimento et contradiccione quorumlibet hominum. Actum pleno in consilio fer. II. ipso die b. Dyonisii a. d. MCCCCXXXIIII.