Unsern willigen dinst zuvor. Ersamen, weisen, besundere, gunstige liben herrn. Als wir euch vormals wie oft ubern Stephan Harnuschmeister und sein weib geclagt haben, wie uns die unsern vetter Gindrzich Braun in ein gutem geleit unvorschulter sachen abgefangen und fürder ein andern herrn pözlich, velschlich undvorheitlich übergeben hat, also clagen wir ewer ersamen weisheit noch ubern denselbigen plutvorkaufer, daz er uns unßern vettern aus ewr stat und geleite mit briefen und potschaften ken den von Swamberg mit unwaren worten beswert, das wir wol derweisen wollen, daz er in ungütlich doran tut, also daz in der von Swamberg hat wollen lassen vorsuchen, daz in denn von etlichen unszern guten gunern ist widerraten worden und mocht damit, daz man uns unszern vettern nicht wil von staten lassen noch ausczupurgen geben. Dorumb biten wir ewer vorsichtige weisheit, sulche lang erweiste und auch czukunftige dinste, die wir euch noch williclich erweisen wollen anczusehen und den genanten plutvorkaufer mitsampt seinen weibe und habe, sintemolen er ewrs geleits und auch sein selbs nicht schonen wil, wider uns in ewr stat und auf ewrn gutern nicht zuhalden. Des wollen wir euch vleissiclich vor herrn, rittern, knechten und steten danken und wollens auch umb euch noch allen unßern vermügen fruntlich und sunderlich gern vordinen. Geschehe aber des nicht, so künden wirs andes nicht vorsten, denn daz euch unser und unsers vettern schade und schande liep were et cetera, und biten des ewr beschribne antwort bey disen boten. Gegeben unters Sigmunds und Steffan Brauns insigl, des wir hernachgeschriben auf diszmal alle gebrauchen. Anno domini et cetera xxxii° in die visitationis Marie. Sigmund, Steffan, Philip Jacub Braunn, Peter und Jorg Kffeller, Jorg und Nikel Hawg et ceteri.