Mynen fruntlichen dinst. Ersamen wyesin liben frunde. Umb daz gerete, daz ir hynne czu Awsig habet, daz ir dar umbe bestalt habet, daz man uch hen heym furen sulde, alz laße ich uch wissen, daz ich dez geretes nicht tar weg laßen furen, ich sege denne myns genedigen hern briff, und gloube ich wol, daz ir mich dar umbe nicht vordenket. Ouch habe ich derfarn, wy daz ir Nicklaus Theschener in vordechtnis habet, der von uwern wegen by mir hynne lyt, alz laße ich uch wissen, daz ich in hynne mit willen behalden habe von myns genedigen hern wegen, durch dez willen, daz her mir ... unde willig in allen sachen gewest ist von myns genedigen hern wegen, daz ich im gerne danke, unde bitte uch, daz ir nicht gloubet, ab uch imandez anders von im sagete. Gegeben under mym ingesigel. Dominica ante Georgii czu Awsig.

Caspar Rechenberg, heutmann czu Awsig.

Den ersamen unde wyesen burgermeister unde dem ganczen rathe der stat Lipczig, mynen besundern guten frunden.

Lístek: Ouch alz sie den selben uwern dyner bered haben von der armbroste wegen, dy hynne bleben sind, als laße ich uch wissen, daz ich den selben uwern dyner Nicklaus mit namen geheissen unde gebeten habe, dy selben besten armbrost hynne behalden, und gloube uch wol, in nicht dor umbe czu vordenkene.