Wir Sigmund von gotes gnaden Romischer kunig zu allen zijten merer des richs und zu Hungern, zu Behem, Dalmacien, Croacien etc. kunig bekennen und tun kunt offembar mit disem brief allen den, die in sehen ader hören lesen, das fur uns kommen sind der burgermeistere, rate und burgere gemeinlichen der stat zu Brüxe, unsere liebe getrewen und baten uns mit fleisse, das wir in ire privilegia, handvesten und brieve, die sy von seliger gedechtnüss unsern vorfarn, kunigen zu Behem uber ire freyheyte, gnaden und guten gewonheyten herbracht und erworben haben, bestetigen, vernewen, bevestnen und confirmieren gnediclich geruchten. Des haben wir angesehen und eygentlich betrachtet ire fleissig bete und auch getrewe nücze und unverdrossen dienste, die die vorgenanten burgere und stat zu Bruxe seliger gedechtnuß dem allerdurchleuchtigisten fursten und heren hern Karl Romischen keyser zu allen zijten merer des richs und kunig zu Behem unserm lieben heren und vatter, unserm lieben bruder kunig Wenczlawen offte williclichen und nüczlichen getan haben, uns teglichen tun und furbaß desterbaß tun sollen und mögen in kunftigen zijten. Und haben mit wolbedachtem mute, rate unsere fursten und getrewen und von rechter wissen denselben burgern und irer stat alle und igliche ire privilegia, handvesten und brieve, die sy von unsern vorfarn kunigen zu Behem uber ire frijheyte, gnaden und rechte und gute gewonheite, rechte und redlichen herbracht und erworben haben, es sy uber erbe, eygen lehen, pfantschaft oder sust anderley sachen welicherley die sind, der sy in gerulicher und nüczer gewere seint, bestetigt, vernewet, bevestiget und confirmiert, bestetigen, und confirmiern in die von kuniglicher macht zu Behem in craft diß briefs und meynen, seczen und wollen, das alle solich privilegia, handvesten und brieve volkommen volle und gancze macht haben und halden sollen in aller dermaßen, als sy hierinne von worte und zu worte sunderlich geschrieben weren. Und gebieten dorumb allen und iglichen burggraven, hauptleuten, amptleuten und sunderlich dem undercamrer unsers kunigrichs zu Behem, der nu ist, oder in zijten wirdet und sust allen andern unsern und des kunigrichs zu Behem undertanen und lieben getrewen ernstlich und vesticklich mit disem brieve, das sy die egenanten unser burgere und stat zu Bruxe, unsere lieben getrewen wider solich unser bestetigung an iren gnaden und freiheyten nicht hindern noch die irren in dheinwis, sunder sy dabij getrulichen und ungehindert bliben laßen, als liebe in sey unser swäre ungnade zu vermiden. Mit urkund diß briefs versigelt mit unserm kuniglichen anhangendem insigel. Geben zu Brüxs, nach Cristi geburt vierczehenhundert jare und dornach in dem einundczweintziigsten jare, am nechsten montag nach dem heiligen Cristtag, unserr riche des Ungrischen in dem vierunddrißigisten, des Römischen in dem eylften und des Behemischen in dem ersten jaren. vpravo na plice Ad mandatum domini regis Franciscus prepositus Boleslaviensis.