Lieber Sigmund. Wir haben dir nehst von der Beheime samnung und geleger vor Pillsen, auch von der sorge irs herawßziehens unsern rat und meinung in einem brief und zetteln bei unser selbs botten guter maß verschriben, die du nu wol vernommen hast. Also tun wir dir zu wissen, daz unser gnedige herren der bischof von Bamberg, marggraf Fridrich von Brandemburg und herzog Johan von Peyern seid bei uns gewesen sein und sich mitsampt unsern freunden, die wir zu iren gnaden darumb bescheiden hetten, von notdurft und gelegenheit derselben dinge vast unterredt haben, und besunder in einem stuck auf söllich meinung, daz sich diselben drei unser herren die fürsten ieder in ein sein slosse gegen dem walde mit irem volke legen sullen und sullen wir und andere in sust greisig volk zuschicken sich damit aufzuhalten, so man best möcht, ob des not geschehe. Da aber wir niht grossen trost zu haben. Darnach sein sie zu rate worden, daz ir gnade und wir mitsampt in unsern erwirdigen vätern und herren des heiligen conciliis zu Basel hiemit darumb schreiben, des wir dir ein abschrift hierinnen verslossen schicken. So schreiben dieselben drei fürsten auch hiemit unserm gnedigen herren herzog Wilhelmen von Peyern stathalter et cetera und haben im zu andern schriften ein abschrift des vorgenanten conciliis brief auch eingeslossen; da bestell, daz diser bott dieselben brief on verziehen antwurte. Das verkunden wir dir also, daz du dich nach unser notdurft auch wissest darzu und darein zu richten zu halten und zu tun, wie und wo dich not und gut dunk, als wir uns wol zu dir versehen. Und besunder ist unser meinung, als bald du vernemest, wie sich die dinge mit den Behmen zu Basel machen wellen oder ob dir sust icht begegnot, daz dich notdurftig dewcht uns zu wissen, daz du uns das allweg unverzogenlich verschreibest. Daran tust du unser wolgefallen. Datum sub sigillo Ulrici Haller magistri civium sabato ante Bartholomei.