Unser fruntlich dinst zuvor. Ersamen und weisen lieben herrn! Als ewern weisheit nu leider wol wissenlichen ist von des slosses wegen der statt Mies, das da verloren und gewunnen ist worden, darumb lieben herrn bitten wir ewer weisheit mit ganczem ernsten durch gotes willen und seiner lieben muter Maria willen und durch aller heiligen willen und durch des heiligen cristenlichen gelawbes wegen und von unsers gnadigisten hern kuniges wegen, das ir uns zu hilf wollet komen mit ewer macht, so ir meist müget; so hoffen wir mit gotes hilf, ewer hilf, der lantschafft und andrer herrn ritter und knecht und sust vil ander frumer lewte wollen mit der aller hilf daz slos Mies wider gewinnen, wann wir soliche kuntschafft haben, das wir mit gotes hilf die stat wider czu uns wollen pringen. Und darumb lieben herrn, seit in dem nicht saumig bei tag und nacht, wann daz grosse not ist euch und uns. Geben am montag fru nach sant Michels tag anno et cetera xxvi°.