Also dy ketczer zum letztin warin unde kegin Prewczin zyhin woldin, do sy qwamen keyn dem Bobirsberge, do lysz her Petir Cordebog kegin en reythin unde Enderleyn, seynen knecht, den ich nů nest umbe stroszinraub habe lossin hengin; unde der selbte Endirleyn von herzogen Hans geheisze wegin had mer sy gefurt in meyn dorff Benen unde ouch keyn Bolindorff, keyn Dobra, Nismenaw, meynen mannen unde meynen armen leutten grossen schaden thaten, unde wirdige den 200 schog Bemischer guter groschen, des schaden mich meyne armen leute gemechtiget haben, als der machtbriff ausweysit, dorynne dy leuthe itczlicher besundern beschrebin sted unde gewirdigit ist. Das do geschen ist in dem drey unde dreyzigistin jarn den dornstag nach jubilate unde wil herzoge Hans nicht vorwissen, her habe rath unde that doran, unde macht sich domete schalbar unde anrüchtig, das se seyn knecht gefurt had, unde der that schuldig.