Hochwirdigen und durchlewchtigena fürsten und herren. Unser undertenig et cetera gnedigen herren. Als ewr hochwirdikeit und durchlewchtikeit uns und andern die mit uns in einung sein verschriben hat, wie ewr furstenlich gnade bedunk daz von des grossen jamers mört prants plutvergiessens und vil anderr merklicher übeltet und scheden wegen, So die unglewbigen hussen von Beheim an der heiligen cristenheit und an vil landen und lewten laider on allen widerstant türsticlich begangen haben und des hinfur mer zu besorgen ist, der ganzen cristenheit ewerr gnaden andern fursten herren stetten und allen cristonmentschen Dewtscher lande gross notdurft sei sich zusamenzufügen und samentlich zu underreden wie man dem widerstee; darauf ewr fürstenlich gnade begert, unser erber botschaft auch gen Aschaffemburg zu schiken auf den dinstag zu nacht nach dem sunntag reminiscere schierist et cetera: das haben wir zu sundern gnaden und gut vernomen. Und dunkt uns auch merkliche grosse notdurft sein die dink stattlich fůr hand zu nemen, damit söllichen sweren bösen lewfen noch bei zeit widerstanden werde. Und also wellen wir unser erber botschaft auf die vorgenant zeit gern gen Aschaffemburg senden. So wellen wir das unsern frewnden die mit uns in einung sein auch verkünden. Denn wo wir ewerr hochwirdikeil und durchlewchtikeil dienst und wolgefallen et cetera. Scriptum sabato post Mathie apostoli.