Ich heinrich posseck zu hasla gesessen Bekenne fur mich mein Eliche hawsfrauwen und alle unsere Erben und nachkomen offenlich an disem briff allen den die In sehen horen oder lesen das wir unsere czweu höfe dy wir gehabt haben zcu neher voydersreut auff dem eynem do zu der czeit aufsiczt der wittych und vir kar getreides halp korn und halp habern douon czinset und auch weysod und auff dem andern hof do der hanns pruhler auffsiczet und achthalben newen grosschen und auch weysod douon czinset. Dieselben höfe mit manschafften Czinsen Scharbercken Wiesen Eckern holczern Vellden Wassern Stocken Steinen Wunnen Weyden und allen zugehornugen unter der erden und darüber sie sein in dem briff beschriben oder nicht keinerlei ausgenomen als wir dieselben höfe und Ire zugehornuge ynne gehabt und herbracht haben und alz die an und komen sein haben redlich und recht und erbiclichen zcu rechtem Erbe und von dem heiligen Reich zulehen zcukauffen geben und verkaufft dem Ersamen weisen Niclasen Gumerauer Burger zu Eger seiner Elichen hawsfrawen und allen sein Erben und Nachkomen und geloben In denselben hof mit allen Iren zugehornugen zuuertreten und zuuersprechen und von allen ansprachen gegen allermenyclich zu freyen zuledigen und zu entwerren Jar und tag alz Stat und landes zu Eger recht ist und gereden auch daz wir noch nymants von unsern wegen furbas ewiclich nymeriner keinerley zuspruch fordermig noch recht darczu noch dornach sullen noch wollen gehaben weder mit geistlichen noch werntlichen rechten noch in keynerweise on allez geuerde. Und des zu urkund hab ich ebenanter Posseck mein Insigil an disen briff gehangen und hab gebeten die Ersamen Conrat meinlen und Thomam Schrotlen zu der zeit des ynnern Rates zu Eger die durch meiner pete willen des zugeczewknuss In on schaden Ire Insigil auch an disen briff gehangen haben. Der geben ist nach Cristi geburt Tausent vierhundert dernach in dem Sibenundzweinczigisten Jare an Sand petri und pauli tage.