Nos frater Jodocus de Swyn prior, totusque conuentus venerabilis monasterii montis paracliti in Oywen ordinis Celestinorum, dilecto nobis in Christo ac venerabili viro domino Raczkoni, archidiacono Lüthomyericensi et ecclesie Pragensis tumbario, salutem et spiritualium incrementa bonorum. Supernorum carismata donorum licet uniuersis sint communicanda fidelibus, ad eos tamen debent largiori emanacione profluere, quos specialis prerogatiua dileccionis merito reddit acceptos. Deuocionem itaque vestram, quam ad nostram religionem geritis specialem, sollicite intuentes, qui ymo ob beneficia nobis hilari mente crebius exhibita vobis, ut premissum est, omnium missarum, oracionum, predicacionum, ieiuniorum, abstinenciarum, elemosinarum, vigiliarum, laborum omniumque bonorum, que per nos dignabitus diuina clemencia operari, partem concedimus tenore presencium specialem in vita pariter et post mortem. In cuius rei testimonium has patentes litteras vobis fieri fecimus utrorumque nostrorum sigillorum appensione munitas. Datum in Oywen anno domini M°CCCCXXII in die sancte Barbare virginis et martiris gloriose.