Hanns von Hockinborn ad senatum Gorlicensem: Als ir mir geschrebin hat von des tages wegen, den land und stete gemacht habin zwischen herzoge Hanns und uns, und wist ir wol, das ich uch in meinen brifen vormals geschreben habe, das ich zu dem tage gerne kommen wil und in allir mosse also haldin, als wir denne zur Zittaw dovon gescheiden syn, also ferne das ich sicher geleite habe mit den meinen zu und abe et cetera. Gegebin zum Zär am nestin mitewoche vor unser libin frauen tage assumptionis anno 1427.