Sigismundus etc. Notum facimus etc., quod nos attendentes et benigne considerantes fidelia obsequia fidelium nostrorum civium civitatis Cadanensis nobis et corone regni Bohemie exhibita nec non gravia dampna, que iidem cives in disturbio gwerrarum regni Bohemie sunt perpessi, animo deliberato sanoque nobilium nostrorum et eiusdem regni fidelium communicato consilio et ex certa nostra sciencia auctoritate regia Bohemie prefatis civibus et inhabitatoribus predicte Cadanensis civitatis hanc graciam specialem facientes ipsos a solucione et dacione summarum seu censuum regalium nobis ad nostram cameram regalem annuatim debencium a die date presencium ad sex annos proxime continuo sequentes libertavimus et absolvimus, libertamus et absolvimus per presentes, sic quod prefati cives infra predictos sex annos nullam huiusmodi summam seu censum nobis vel officialibus nostris ad cameram nostram aut alias dare teneantur, sed pro illis dicto tempore sex annorum durante liberi sint et penitus absoluti, ut ipsi interea ipsam civitatem eo melius valeant restaurare. Mandamus igitur universis et singulis officialibus et signanter camerario et subcamerario regni Bohemie, fidelibus nostris, qui nunc sunt seu pro tempore fuerint, quatenus ipsi a prefatis civibus Cadanensis civitatis per prefatos annos futuros nullam bernam seu censum regalem nostro regio seu ex officio sui nomine exigant nec recipere debeant quoquo modo, neque ipsos cives pro huiusmodi censibus angariare, turbare aut inquietare ullatenus presumant nostro regio sub favore. Presencium etc. maiestatis. Datum Prage VI. ianuarii anno etc. XXXVII.