Unsern willigen und fruntlichen dinst zuvor, gestrengen, woltuchtigen, ersamen und weisen hern, besundere guten frunde. Noch sulcher beslissunge und beredunge, als es denn in kegenwortikeit land und stete durch unsers allergnedigsten hern des Romischen et cetera koniges rethe vorlassen ist, das uns hulfe zugelegit sal werden, das land und stete voryoet haben, dorynne ir euch redelich an euirm teyl erzeiget habit, das wir euch vor seinen koniglichen gnaden wollen grosslich danksagen, und nu fordert ir die euern in euerm brive bitende, sie lassen reyten et cetera. Also mag euere fruntschaft ye wol wissen, das es vor den obgenannten unsers gnedigsten hern des koniges rethen vorlassen ist, so wir oberzogen werden, das denn sulche zulegunge und hulfe von uns nicht abgewant werde; dorumb, lieben herren und frunde, bithen wir euch dinstlichen mit vleisse, ir wollet sulche ordenunge und vorlassunge vor sich lassen geen, als denn begriffen ist, und wollet sunderlichen ansehen, wye wir mit den vordampten ketczern allumb und umb umbgeben sein, und doch gar besorglich were, so der ofbruch der euern geschee, das sie sich wider uf uns wendten, und unsers allergnedigsten hern des koniges stat möcht also, do got vor sey, zu unvorwintlichen schaden komen. Dorumb getraue wir euch wol, ir thuet hirynne, als wir euch getreuen. Dass wollen wir euch vor unserm allergnedigsten hern dem konige danksagen und willig umb euch in heischenden zeiten, ab sichs ymmer worde geboren, fruntlich vordinen. Geben an sente Johannis tage des ewangelisten under unsern statsecret, das die manne mitgebrauchen.

Auch, lieben herren und frunde, wir bieten euch dinstlichen, ab ir icht guter neuer zeittunge von unserm allergnedigsten hern dem konige vorstanden hettit, also die koufman gemeyniclich zu euch durchzihen, uns das wollet vorschreiben, und als ir wol wisset von der von Budissen wegen, die euch botschaft getan haben, ab sichs machen würde zu einem ofzug als wir zu gote hoffen, das ir derynne helfit hantlangin, das den vordampten ketzern den doch wol zu steuern were, möcht ir hohmut und bosheit gesteuert werden. Dobey wollen wir auch gerne das beste helfen thun noch unserm besten vermögen, und an uns sal kein abgang sein. Auch hettit ir icht vornomen von den Thaboren, die in der Slesie sein, was sie fürhaben, uns das vorschreiben wollet, das wollen wir willig umb euch verdinen.

Landmann und rathman, eldisten und geswornen hantwekmeister des landis und stat Zittaw.