Wir die rauttgeben der stat zů Augspurg bekennen offenlich mit dem briefe und tuen kundt allermenglich, das dierr gegenwortig arm geselle mitt namen Hanns Decker von Sant Gallen, zaiger diz briefs, durch ettlich unser mittburger in das land gen Behem gesenndet ist von ains irs gelters mitt namen Dominicus Behem, ains wirts ze Mentz, der in merklich sum gelts schuldig gewesen, von Mentz in das land gen Behem gewichen ist und das ir, das sy im als ainem wirt zů behalten gegeben haben, hingefůrt hat. Und als der benant arm gesell gen Behem nit ferr von Tauß komen ist, so sint ettlich ungeloubig ketzer und ůbeltätter an in komen und haben im ain hant abgehowen und darzů im brief, gelt und was er bey im gehabt hatt, genomen und im sunst uncristenlich und jamerlich on all barmhertzikait umbgezogen und herticlich mißhandelt haben. Als wir das in warhait aigenlich erfaren haben, das ditz also an im selbs ist und das im sollich kumber umb dehain mißtat noch unrecht zůgerogen ist, das wir reden und schreyben, wie wir ain warhaitt billich reden und schreyben sůllen. Und dez zů urkundt der warhait haben wir unser statt clain insigel uns und unser statt unschadlich offenlich gehangen an disen briefe, der geben ist an freytag vor sant Kathereynentag, do man zalt nach Cristy geburtt viertzehenhundert und im zway und dreyssigisten jare.