Von gottes gnade Conrad, erczbyschoff zu Meyncze et cetera und Ludewig, pfalczgrave bii Ryne und herczog in Beyern. Unsern fruntlichen gruss zuvor. Ersamen, wysen, guten fründe! Als ir wol vernomen hant, wie die bosen verdampten hussen und keczere von Beheim mit yeren helffern und zulegern yczunt in grosser menýge über die hochgeborne ffursten, heren Fryderich herczogen zu Sachsen und marggraven zu Missen, und heren Fryderichen landgraven ir Doringen ynn ire lande, gen Myssen gezogen, etwevil stette, merkte, dorffere, clostere und stieffte gewonnen, verstoret und verbrantd und vil fromer, erbern cristen, menschen, geistlicher und weltlicher jemerlicher vermordet, verbrantd, getödet, das lantd verwüstet und unmenschliche und unermessliche schaden darinn begangen und getan hant, und nu furbass herus uber den hochgebornen fursten, hern Fryderichen, marggraven zu Brandemburg und burggraffen zu Nuremberg gezagen sint, und ym sine stette, zum Hofe, Culmenach, Beyerrüte und andere und auch merckte, dorffere, clostere und kirchen angewonnen, verbrantd, verwustet und verstoret hant, und nugein Bamberg zu gezogen und dieselben statd auch gewonnen und innehant, und sich also ye furbas herus in diese lantd nehern, auch daryn zuziehende, die zu verwusten und zuverstören, dem almechtigen got, unserm hern Jhesu Cristo, siner werden mutter Marien und allem hymelischen here zu smacheit und lesterunge und zu verstorunge der heiligen kirchen und des heiligen cristenglaubens und der gemeynen dütschen lande, das alles herschrockenlich und clegelich ist zu schriben, und auch allen cristenfürsten und andern cristengleubigen, billichen zu hertzen geen sol. Wand wir nü mit hilffe und bystand andern unsern mitkurfursten, andern fursten geistlicher und weltlicher, graven, fryen herren, rittere, knechte und stette und aller der, die wir darzu herwecken und ufferingen mögen, mit unsern selbs haben unsere ritterschafte, landen und lüten und aller unserer machte zu rosse und zu fuße dem almehtigen got zulobe und eren, dem heiligen cristenglauben, dutschem lande und der cristenheit zu rettunge, zu sterckerunge des heiligen cristenglaubens zuziehen und die vorgenannte hussen und ketzere in ziide und ee sie grosseren ubernthant nemen, mit gottes hilffe bestrytten wollen, so begeren und ruffen wir uch an von unsern und andern unsere mitkurfursten wegen, fruntlich und ernstlich und hermanen uch alles des des wir uch hermanen konnen, sollen und mögen, das ir wollent ansehen und betrachten solichen grossen frevel, gewalt, ubeltatd, smacheit und bosheite, die die vorgenannten bosen hussen und ketzere dem almehtigen gotte, siner werden mutter Marien, der hymelischen konigin, allen gottes heiligen und allem hymelischen here zu smeheniss und lesterünge und zu verwustunge und verstorunge cristenliches glaubens und alles erbern wesens geistliches und weltliches states, dutscher lande, lange ziit begangen und getan hant und leyder von dag zu tage, ye mee understeend zutün, und das ir mit aller uwermachte zu rosse und zu fusse czu wollent ziehen, und damit uff den sontag „invocavit“ zu Heylpronne und da umb sin bü andern fursten, graven, heren, rittern, knehten und stetten, die als dann auch dahin komen werdent, mit denselben turbass zu ziehen, an die grosse sammenunge, do wir dann alle zusammen kommen werden, die vorgenannten hussen und ketzere zu bestrytten, und wollent uch dem almehtigen gott zuforderste, siner werden mutter Marien und allem hymelischen here zu lobe und eren und dem heyligen cristenglauben und der cristenheit zu rettunge und sterckunge als getruwlich und ernstlich herinn bewysen, als uch das als fromen cristenluten zugebüret und wir uch gentzlichen wol getrawen. Davon empfahent ir von dem almehtigen gott dancknemen, lone und gross lob und ere gegen den gantzen cristenheyde. Datum feria tertia post festum purificacionis beate Marie virginis gloriose, anno et cetera CCCCXXX.