D. f. magistro Guillermo Maligeneri, capellano nostro et causarum palacii apostolici auditori, salutem et apostolicam benediccionem. Litterarum sciencia, vite ac morum honestas aliaque … merita, super quibus d. f. Johannes Andree de Pelhrzymow, clericus Pragensis diocesis, bacallarius in decretis, … commendatur … , nos inducunt, ut sibi reddamur ad graciam liberales. Exhibita siquidem nobis nuper pro parte dicti Johannis peticio continebat, quod orta dudum inter quendam Wenceslaum Czamprlik presbiterum et d. f. Johannem de Kssel, qui se gerit pro presbitero dicte diocesis, super altari s. Crucis sito in ecclesia Pragensi, quod tunc per obitum quondam Wenceslai de Zacz, ipsius altaris rectoris extra Romanam curiam defuncti, vacans Wenceslaus Czamprlik sibi auctoritate ordinaria collatum et de illo provisum seque illud assecutum fuisse canonice dictumque Johannem de Kssel se collacioni et provisioni ac assecucioni huiusmodi contra iusticiam opposuisse … , Johannes de Kssel vero predicti prefatum altare ad se de iure spectare asserebant, prout ipse Johannes de Kssel adhuc asserit, materia questionis et causa huiusmodi per appellacionem dicti Wenceslai Czamprlik ad eandem curiam legitime devoluta, nos causam ipsam tibi ad instanciam dicti Johannis de Kssel audiendam commisimus et fine debito terminandam, tuque in causa huiusmodi ad nonnullos actus, citra tamen conclusionem, inter partes ipsas diceris processisse. Cum autem … lite huiusmodi sic coram te indecisa pendente prefatus Wenceslaus Czamprlik, in possessione dicti altaris existens, extra dictam curiam fuerit vita functus, nos statum cause huiusmodi habentes presentibus pro expresso et ne alicui in dicto altari viciosus pateat ingressus, si lis ipsa legitimo careat defensore, qui tueatur eandem, providere dictoque Johanni Andree, qui, ut asserit, per nequam scismaticos Wicklefistas et Hussistas nuncupatos nonnullis bonis spoliatus fuit, … graciam facere volentes, discrecioni tue per apostolica scripta mandamus, quatenus eundem Johannem Andree … in omni iure et ad omne ius, si quod dicto Wenceslao tempore dicti sui obitus in dicto altari seu ad illud quomodolibet competebat aut competere poterat, auctoritate nostra surroges dictumque ius sibi conferas, et nichilominus si … tibi constiterit Wenceslaum Czamprlik non habuisse et Johannem de Kssel non habere ius in altari prefato, altare ipsum, quod sine cura est et cuius fructus … tredecim marcharuum argenti … valorem annuum … non excedunt,... eidem Johanni Andree eadem auctoritate nostra conferas et assignes, inducens … , contradictores … , non obstantibus … seu quod nos dudum eidem Johanni Andree, ut asserit, de canonicatu et prebenda ecclesie s. Petri Wissegradensis prope Pragam, quorum fructus … vigintiquinque marcharum argenti … valorem annuum non excedunt et quorum possessionem non habet, tunc certo modo vacantibus et antea disposicioni apostolice reservatis, per alias nostras litteras graciose duximus providendum. Nos enim … Datum Rome apud s. Petrum non. Januarii pontificatus nostri a. sexto.