Ich Düring von Halbil, hawptman ze der Ygla, bekenn, als ich dem hochgeboren fürsten, herczog Albrechten, herczogen ze Österreich etc., meinem genädigen lieben herren, yeczund hie ze der Ÿgla gesoldent hab zway hundert und czweliff werleicher ze rossen auf ain halbs viertail iars, das sich enden wïrdet auf den nachst künftig Phingst tag, also ist aim yegleichen werleichen ze rossen das halb viertail iars ze sold beschaiden fünff guldein, das also in sum bringet tawsent und sechczick guldein, also hat der vorgenante mein genädiger herr die vorgenanten soldnär die czeit ïrs solts gancz ausgericht und beczalt und sag in darumb genczleich ledig und los. Mit urkund, geben ze der Ygla am phincztag in den Osterfeyrtagen anno Domini etc. vicesimo tercio.