Bekenen, das vor uns in gehegtem dinge komen ist die toguntliche fraue Vrsula, itczund unsir meteburgerynne, die etwenn Peter von Mezirzicz burgers der Grossen stad zu Prage, dem Got gnad, eliche tachter ist gewest, und iczunt des erbern mannes Caspars Otlyngers von Prage, itczund unsers meteburgers, eliche husfrau ist, mit dem erbern manne Peter Seygensteyn, irem sundirlichen gekoren vormunden, burger zu Breslaw, und hat mit guttem freyen willen recht und redlich vorreicht und ufgegebin dem vorgenantem Caspar Otlynger, irem elichen mann, den anfal mittenander, der sie ankomen und von naturlicher erfalgunge von etwenn Peter von Mezirzicz, irem bruder, und Elizkan, irer swester, den ouch beiden Got gnade, andirstorben ist, nach usweisunge des gescheftbriefes, domete der vorgenante Peter von Mezirzicz, ir vatir, seyn geschefte und leczten willen geschaft und beschrieben hat, und hat im desselbin anfals gancz und gar abegetreten und allenthalben mechtig gemacht, wellerley derselbe anfal ist, es sey an erbe, an heusern, czinsen, weyngarten, es sey am bereytem gelde ader an schulden, wo ader woran ir das geboren mochte, farnd und unfarnd, keins usgenomen, es sey zu Behmen im lande, im Slesia ader andirswo, also das her denselbin anfal iczund ader wenn und wo her das bekomen kan fordern, innemen und den haben und halden sal mittenandir, keins usgenomen, mit allen sulchen rechten, als sie demselben anfal gehaben mochte und als ir der ankomen und andirstorben ist mechticlich und ewiglichen, domete zu tun un zu lassen vor allirmeninglich ungehindert, er sey geistlich ader wertlich.