Mein dinst mit behagelichkeyt zuvor. Erbirn und weysin libin hern. Ich thu euch zu wissen, das dy hussin, dy in Ungirn sint gewest, das dy hir wedir czyhen und legen wol fumff meylen von Jegerdorff und sendin gros gut kegen Behemen, das se von Ungern brocht habin und das heer czewhet eylende herap kein Nymptsch und wellen wartin ap so dy lewte do vor mochten irsleychin. Doryne libin hern warnet dy erbirn lewte das se ich zu schadin kommen und wisset, das das worhafftig sol seyen. Auch wisset, das meyn hirre ist abegeczogen von Reybnik und by Thaborn habin das haws noch ynne uff eyne beredunge. Dorine warnet dy erbirn hern eebesser das se nicht schände und schaden empfehen, alz se vor habin gethan. Auch vordrewst mich sere, das ir mir nicht eyne antwort habit gesant mit meinem botin und meynet, ir wold mir eyne antwort sendin mit ewren botin des ben ich beytende. Gegen zu Jegerdorff an dir methewochin noch Urbani. Auch hot man mir gesagt, das der selbin Thaborn kawme III tawsint seyn und 1 ½ hundir wagin, dy man geczalt hot, dy czyhen heruff kegen Behemen mit dem rawbe und etwas reytondinge mit en.

Nickel Trache gesessin zu Jegerdorff.