Commissio propria domine regine.

Barbara, von gots gnaden Romische und zu Hungern und zu Behem et cetera kunigin. Wolgeborner und besunder lieber freunt und gunner. Wisst, das uns eur krankhait, dorin ir ietz seit, uns zumal ser laid ist; und wier haben das albeg fur einen schimpf gehabt, aber nun hor wier, das euch des ernst ist. Auch als ir uns zu enpotn, habent wier wol vernomen, wie ir begert, das wier mit herrn Allschen reden sollten, das der on verziehen zu euch komen scholt, nun hab wier das hern Allschen zu wissen getan und selber mit im geredt; nun maint er und spricht, er sei mit solichen sachen und gescheften bestrikt, das er mit nichte vor sand Margarethen tag zu euch komen mug, aber dornach so well er besechen, das er kurzlich bei euch sei. Wier schriben euch gern die hieigen mar, so zweifelt uns nit, oder her Allsch hab euch die lautter zu enpoten, wie alle sach eingestalt haben. In abesen unsers grossen insigel, wan unser canzler nicht anhaim ist und ist mit unserem herrem dem kaiser gen Eger gezogen, geben under unserm secret zu Prag an unser lieben frauen abent, als sy sand Elsbetten in dem gepirg besucht, anno domini et cetera XXXVII^o.