Martinus episcopus, servus servorum Dei, dilecto filio, preposito ecclesie sanctorum Petri et Pauli in Budissyn Misnensis diocesis, salutem et apostolicam benedictionem. Conquestus est nobis Stephanus, decanus ecclesie Omnium Sanctorum in castro Pragensi, quod Vincencius abbas et conventus monasterii Beate Marie in Cella Cisterciensis ordinis Misnensis diocesis super quibusdam clenodiis aureis et argentis, pecuniarum summis et rebus aliis iniuriantur eidem. Ideoque discretioni tue per apostolica scripta mandamus, quatinus vocatis, qui fuerint evocandi, et auditis hincinde propositis, quod iustum fuerit, appellatione remota, usuris cessantibus decernas faciens, quod decreveris, per censuram ecclesiasticam firmiter observari. Testes autem, qui fuerint nominati, si se gratia, odio vel timore subtraxerint, censuram simili appellatione cessante compellas veritati testimonium perhibere. Datum Rome apud sanctos apostolos IIII Idus Aprilis pontificatus nostri anno decimo.