Edler L. Herre! Als ewr edel vns verschriben vnd ein abschrift gesandt hat, warauf die Hussen yeczunt beliben seyn etc. des danken wir ewer edell mit ganczem Fleisz bittend, ob ewr edell hinfür icht treffenlich dauon vernême, vns das auch gütlich wissen zu lassen, als sich denn ewr edel selbs günsticlich erbotten hat. Als denn ewer edel begert hat von der von Amberg wegen etc.: Also bitten wir ewr edell zu wissen, were yemants von Amberg ewer edell oder den ewern selbs schuldig, der bey vns on geleyt wêr vnd mit Recht bey vns darumb angelangt wurd, da hülff man bey vns Rechts vmb: aber fremd Lewt bey vns anczulangen vmb sache, die sie selbs niht angeen oder einen für den andern zu verpieten, das ist des Reichs gerichts form vnd herkomen bey vns niht. Das well ewr edell in gut versteen oc. Als denn ewer edell in vnserr nehsten schrift von vnsers gnedigisten Herren ... des R. etc. K. gelegenheit auf dise zeit vernommen hat, also ist vns kurtzlich zu wissen worden, wie etlichen Lewten bey vns schrift komen sey, daz derselb vnser gnedigister Herre ... der R. etc. Künig von Mailan gen Placencz sey komen vnd daz der Herre von Maylan seynen küniglichen gnaden volk leihen vnd zuschiken well, also meyne sein küniglich maiestat gen Rom zu vollcziehen sein keyserlich Crönung zuempfahen. Denn wo wir ewer edel Lieb oder Dienst etc. Datum feria IIIIe Dorothee.