Nota. Anno domini 1433 am dinstage in den osterhiligetagin sint dy manne dicz landis zu Gorlicz bey enander gewest und hattin eine handelunge under eczlichin andern sachin, als von des gefangen ... bachin wegin zu Cunaw, den man dorumbe ufgenomen hatte, das her abe und zu liff kein Cunczindorff zu George von Redern umbe spehe wille der stat zu schaden, dorumbe sich Nickil Konigishain und Cristoff von Cunaw sere muheten kein deme rate und wuldin in io los haben, und als man in den nicht zugeben wulde, do einte sich Nickil Kongishain, Cristoff von Cunaw, dy jungin herrn zu Baruth und swuren enander eide mit eczlichin andern mannen im lande zu Gorlicz, das ir 10 mit enander woren und machtin ein sulchin bunth, ab sy desze stat ader sust ymands anders drungen adir geweldigen welde, das sie sich des weren wellin und kein im schuczen wellen. Ader der bunth ist des grostes obir dese stat gemacht, und Nickil Konigishain hat seynen buntgenossin vorheissin, so is in not tut, das her in alleine 100 pherde furen wil. Item Hanus Feytlender son und Nickil Debeschitcz sein mete in dem bunde.