Unszern willigen dinst zuvor. Ersamen, weisen, lieben herren! Wir tun euch czu wissen, daz wir alz hewt gewesen sein pei unßzer herrn gnaden, den markraffen van Branburk czu Turschenrewt, und er erst an dem obent kum van pischoff van Wirczpurk und uns sagt, daz sein gnaden mit ym geret het, alz van des czugs wegen, dar auff er ym wider antwort und noch nicht mainung hat, uber den walt czu rukken, wan er wol vernomen het, wie daz dieselbigen noch nicht kumen weren, di dan darczu kumen schullen czu dem czug; yedoch so hat markraff van Branburk mit ym so wil geret mit pischoff wan Wirczpurk und geren gesehen het, wie das er mit ym gerukt wer zu dem van Maygssen gen Pehem, des er sich noch heynt beraten wil und ym des als morgen ein antwort geben schül. Auch haben wir wol vernomen, bie das pischoff van Wirczpurk auff die Pemischen herren und steten iren trost nicht über walt zu ruken maynt, dan ez wer sach, daz er yn allen stark wer. Auch lan wir euch wissen, daz alz morgen die Pemischen stet und herren pei ym sein schullen zu Pernaw, und wie sy alle sach machen wirt, daz wellen wir euch lassen wissen pei tag und nacht und wellen in allen sachen willig und spest tun ab got wil wan hymel. Und halt daz in geheim, wann uns daz in rotes weis verpoten ist. Geben am montag zu nacht in der dritten stunt anno XXII° et cetera.