Vnser freuntliche willige dinste czuuor. Erbern weisen besunder gunstigen liben freunde. Von schiube wegen, als Odelen, weiser dicz briefs, vor ewr erberkeit gewesen ist, als er euch muntlich des wol vormanen mag, also spricht er, daz er czwir vor euch gewesen sei, und sein widerteil nicht komen sey. Nu wil derselbe sein widerteil im nicht glawben, das er den schub vor euch besucht habe, denne er hab des von euch ein geczeugnucz. Darumb biten wir ewr weisheit mit sunderm fleisse, ir wollet uns beschriben wissen lassen, was ewr erberkeit darumb wissen sey. Das wollen wir in sulchen oder andern sachen freuntlich vordinen. Geben an der heiligen einliftawsent junckfrawen tage anno et cetera XXVII. Der rat czum Elbogen.