Hanns von Hockinborn ad senatum Gorlicensem. Als ir mir bey andern worten schreibt, das der ersame geitliche herr herr Gotfrid von Rademburg, des Deutzchen ordens foyt, mit herr Hannsen von Colditz, mit landen und mit steten ein gütlich sten und fryd zwischen uns und herzog Hannsen von Sagan zur Zittaw gemacht hetten bis auff sand Johannes tag unsers herrn täuffers; und das ich des reytens von der Zittaw zu euch wer kommen, do wert ir eyne und ratis wurden mit den mannen in dem lande zu Gorlitz und der Zittaw, und hett herzog Hannsen von land und stete wegen geschriben, das er den frid umb iren willen wolle auffnemen bis auff den benanten tag; des hett er euch antwort gegeben: er wolle das gerne tun und welde den fryd uffnemen, nemlich 8 tage vor sand Johannis et cetera: bitt ich euch noch mit besunderm dynstlichem fleisse, vorder sulcher abweysung und vorprechnusse wellen abethun und mich eigentlichen wellen lassen vornemen, was ausrichtung und hülffe geschen, was ir unsir gerechtikeit zulegin wellet et cetera, sundir das anzusehen, was unsir eldern und wyr umb dy euern getan haben et cetera. Gegeben zu Wartinberg am dinstage vor unsir frauen visitationis tag.