Unser freuntliche willige dinste czuvor. Erbern, weisen, besunder gunstigen liben freunde! Wann der von Brüx bote, weiser disz brifs, uns von seiner herren geheisses wegen muntlich underricht hat, wie Jacubko gar stark herauff czihe und als heint herauff leicht in das land komme, an dem ir euch furder wol erfurschen mügt, wann er vil brife bey im treyt und ab ir tiffer geheyme an im icht erfürt, das uns czu schaden komen mochte, biten wir ewr erberkeit uns das von stadan schreiben wollet. Das wollen wir umb euch freuntlich vordinen. Geben an sant Wenczlaws tage czu abent anno domini et cetera xxix°. Der rat czum Elbogen.