Nos Sigismundus, Dei gratia Romanorum Rex semper Augustus, ac Hungariae, Bohemiae, Dalmatiae, Croatiae etc. Rex. Memoriae commendamus tenore praesentium significantes, quibus expedit, universis: Quod nos habentes respectum ad praeclarae et inviolatae fidelitatis constantiam, et laudum praeconio laudabilium servitiorum extollenda merita fidelis nostri sincere dilecti, egregii Frank filii Joannis, filii Demetrii de Semse, quibus idem a diuturnorum temporum curriculis, in diversis nostris et regnorum nostrorum praedictorum validis agendis et expeditionibus difficillimis, sicut prosperis ita et adversis, sub diversitate locorum et temporum, et praesertim in praedicto regno Bohemiae, cis civitatem nostram Pragensem, contra quosdam nostros rebelles et infideles haereticae pravitatis contagione infectos, condam Husz damnandae memoriae vias et erronea dogmata, ab Ecclesia dudum reprobatas et damnata, deserere recusantes, Maiestati nostrae rebellare attentaverunt, strenue dimicando et non sine copiosa sanguinis sui effusione nobis famulando, celsitudini nostrae se gratum reddere studuit et acceptum, praetextu quodam, quamquam praefatus Frank multo maioribus a nostra Maiestate donis regiis debuerit remunerari, at tamen ad praesens, sicuti promptis affectibus largius intendimus, in futurum nostram benevolentiam sibi sentiat benigniter fore inclinatam, omnia iura nostra regalia, quae in universis possessionibus et portionibus et iuribus possessionariis condam Petri dicti Chirke de Alapian, videlicet possessione Gard vocata, et praedio Szent-Lörincz, alio nomine Felgrad appellato, nec non medietate possessionum Polii et Migloka nominatarum, ac quarta parte possessionis Socha, et tertia parte possessionis Eneghe nuncupatae, portioneque in possessione Ruska vocata, habitis in Abaujvár. Item in possessione Rencsesö, alio nomine Zvienefov nominata et medietate possessionis Nagyhermani apellatae, a parte orientis existente in Saros, praeterea medietatibus possessionis Alapján praedictae, et tributi in eadem exigi soliti, nec non similiter medietatibus possessionum Ker et Jánoshigya vocatarum, et quorumdam quatuor praediorum ad dictam possessionem Alapjan spectantium, in Hevesiensi Comitatibus adiacentium et existentium quibuscunque rationibus, modis, causis, qualitercunque et quomodocunque haberemus, et nostram quomodolibet concernerent, aut in futurum concernere possent Maiestatem, simul cum universis utilitatibus et pertinentiis quibuslibet, videlicet locis sessionalibus, terris arabilibus, cultis et incultis, pratis, pascuis, rubetis, virgultis, vineis et vinearum promontoriis, montibus, vallibus, piscinis, piscaturis, aquis aquarumque decursibus, molendinis, molendinorumque locis, et generaliter cunctis utilitatum integritatibus, quovis nominis vocabulo vocitatis, ad huiusmodi iura nostra regalia rite spectantibus et pertinere debentibus, ex certa nostrae Maietatis scientia et animo deliberato, Praelatorumque et Baronum nostrorum sano ad id accedente consilio, eidem Frank, filio Joannis, et per eum suis haeredibus et superstitibus, ac posteritatibus universis dedimus, donavimus et contulimus, imo damus, donamus et conferimus iure perpetuo et irrevocabiliter tenendas, possidendas et habendas, annuentes et concedentes, quodsi haeredes et successores eiusdem Frank sexus masculini deficere contigerit, extunc praedicta omnia iura regalia in praescriptis possessionibus et portionibus ac inribus possessionariis annotati condam Petri dicti Chirke habita et existentia, in Ladislaum, filium praenominati Joannis, filii Demetrii, scilicet uterinum ipsius Frank, ac eiusdem haeredes et successores universos devolvantur, pleno iure eo facto, per eum possidenda, iuribus tamen alienis semper salvis remanentibus, harum nostrarum vigore et testimonio litterarum mediante. Quas dum nobis in specie reportatae fuerint, in formam nostri privilegii redigi faciemus. Datum in Vissegrad, Sabbatbo proximo post festum B. Jacobi Apostoli. Anno Domini MCCCCXXVI. Regnorum nostrorum An. Hungariae XL. Romanorum decimo sexto et Bohemiae sexto.