Ich Hanns Scherer, Krawthan tuchmacher und Hanns Maier mitburger zu Eger und ich Francz Ott von Reychestorff bekennen und thun kunt offenlich an disem brife vor allen den dy in sehen oder horen lesen, das wir in rechter furmundschaft von geschicks und geschefftes wegen des Hannsen Frumolts von Czetendorff seligen verschreiben in krafft dicz briefs, den erwirdigen und geistlichen dem prior und dem conuent gemeinclichen prediger ordens des closters hy zu Eger czehen gute behemische groschen ewigs czinsz und selgeretes auf der wiesen genant dy huterm gelegen bei Czetendorff unter der gasz an der Eger dem wasser der dann ist auf drei tagwerk mynner ader mer ungeuerlich und dorumb ein prior und conuente des obgenanten Hansen Frumoltz seligen jarczeit ewiclich sullen begeen aller jerlich ye an dem nehsten suntag vor sand Jacobstag, des abends mit vigilien und leichczaichen und dornach des montags frü mit der selmesse und aufgestackten iren prinnenden kerczen dorumb sy uns fürmünden iren brief gebe haben, also geben wir obgenanten fürmünden in auch widerumb den gegenbertigen brief umb dy obgeschriben czehen groschen almusen czinszes und selgerets ewiclich zuhaben und zufodern auf der obgeschriben wiesen ye czu sand Michels tag und welchs jares sy des wurden verczogen so haben sy ader wem sy es beuelhen on alle clage und on alle erforderung geistlichs oder wertlichs gerichts macht und gewalt der obgeschriben czehen groschen czinszes vorsessens almusens auf der obgenanten wiesen czubekommen wy sy mugen on alle ire scheden als offt das not geschee, und wer auch sach ab wir ader wer dy genanten wiesen ynnen hat wold frei machen der obgeschriben czehen groschen selgerets in kurcz oder in lenge so sol man eim prior und dem conuente dy auf einem andern erbe und gut verschreiben und vermachen, das sulch almusen czinszes wol getragen mag und ein genüge doran haben on alles geuerd und des alles czu urkund und stetikeit haben wir obgenanten furmünden fur uns und alle unser nachkomen von geschicks wegen Hannsen Frumolts seligen gebeten in furmundschaft die erbern und weisen hern Conrad Memlen und Cristoffen Delniczer beide sed rats dy czeit hy zu Eger die ire insigl von unser bete wegen haben czugeczewknusz gehangen an disen unsern offen brief in on schaden. Der geben ist nach Cristi geburt vierczenhundert dornach in dem vierunddreissigsten jare, am freitag sand Agathan tage.