Unsern grus zuvor. Ersamen, weysen, lieben, besündern! Es kompt czu euch der wirdig maister Johanns von Mülenprunn, des heiligen conciliums botte, mit unserm und andern gelaitesbriefen, als man dann nechst czu Eger abgeschiden ist, die den Beheimen zugehören, als ir dann wol wist et cetera. Bitten wir euch mit ernst, das ir ewern flis darinnen tut, als ir allweg willeclich getan habt. Und ist, das die Beheim also kommen werden, so seit ye daruff gedacht, ob man wege vinden und treffen möcht, einen gemeinen friden zu machen auff czway jar. Möcht aber des nit gesein, so seit daran umb einen fride gegen unsern landen als gen unsern oheimen von Sachsen, gen uns, unserm oheim herczog Johansen, gen euch und unsern landen und lewtten et cetera und tut darinne das beste und sunderlich last uns verschriben wissen, was gelegenheit ir von den hussen wist, wa sy ligen oder wes sy willen haben. Daran tut ir uns sunderlich zu danck, das wir gern gen eiuch verschulden und danken wöllen. Geben zu Cadolspurg, am montag noch Bartholomey anno et cetera xxxii°. Fridrich, von gots gnaden marggrave zu Brandenburg und burggrave czu Nürmberg.