Affectu sincere dilectionis cordialiter premisso, frater carissime, literam presentibus interclusam vobis dirigit venerabilis pater et dominus, dominus Arnoldus, abbas in Nepomuk, supplicans caritati vestre instantissime, quatenus eandem quamtocius poteritis per aliquem fidelem nuncium transmitti velitis in Weinzurll prope Krems familiari suo Andree Stader. Et si non occurrit aliquis, qui alias in brevi tempore ad illum locum sit transiturus, conveniatis pro certo precio aliquem fidelem, qui hoc faciat, et quidquid super huiusmodi expenderitis, ego vobis sine prorogatione in tempore reddere non postponam. Insuper literam responsalem vobis presentandum per dictum Andream Stader prefato venerabili patri et domino abbati de Nepomuk ad curiam nostram in Nuremberga per aliquem mercatorem vel studentem remittere studeatis. In quo sibi gratissimum obsequium ostendetis cuius tempore et loco oportunis non invenit oblivisci. Ceterum rogo, ut salutetis sinceriter nomine meo confratres nostros dilectos Iohannem Textorem et Iohannem Paley, necnon Heinricum Halpmeister et Cunradum Ketzsler studentes, annuo nuendo ipsos ut status ac valitudines eorum parentibus suis sepius scribere non obmittant. Benevalete.