Spectabilibus et egregiis viris, magistris civium, consulibus et scabinis civitatis Pragensis, nec non magnificis, nobilibus ac strenuis magnatibus, baronibus et capitaneis exercituum et communitatum regni Bohemie ac marchionatus Moravie dominis potentibus et cetera et cetera et cetera. Que inspirante domino salibriter concepistis, ad consolationem universi feliciter et constanter perficere.

Magnifici, streuni, nobiles et egregii viri! Concors omnium vestra nunc missa pagina magnum nobis in eo gaudium attulit, quod desideratos iam dudum oratores promittit, et statim, sicut eandem ipso die beati Gregorii pape de sero iocundantes recepimus, aliquos principes, potentes etiam et prudentes viros, quorum consilio, favore et ope rem de qua agitur prosequi congruit, opportune adivimus, et eisdem consultis in hoc ipsi finaliter resedimus, quod et vestre magnificentie presentibus indicamus: quod in octava pasche, cum hoc citius secundum vestra scripta et petita propter dominice passionis et resurrectionis celebritatem commode fieri non possit, cum illustribus principibus et dominis, dominis Friderico marchione Brandenburgensi et Johanne duce Bavarie, qui se sponte ad hoc offerunt, et aliis principibus et dominis, vel ipsorum ambasiatoribus, et prudentibus communitatum viris, quotquot de vicinia commode habere potuerimus, ad Egram, quam ad hoc ipsi elegistis, annuente domino veniemus, et cum vestris, quos ad hoc mittetis, oratoribus et nuntiis super salvoconductu et securitate vestris ambasiatoribus et nuntiis ad sacrosanctam synodum Basiliensem mittendis per eandem ac nos suo nomine et mandato oblatis, iuxta traditam nobis a patribus formam, amicabiliter tractabimus, et deo propitio cum dictorum principum, dominorum et bonorum virorum, salutem et gloriam regni vestri nobiscum precantium, consilio, taliter providere curabimus, quod hac parte debeatis ut speramus manere contenti. Datum Nuremberge, die xx mensis martii, anno et cetera xxxii, fratres Johannes Nider prior et cetera et Johannes de Mulebrun nuntii et cetera.