Unsern frewntlichen dinst zuvor, ersamen, weisen, sunderlieben frewnt! Wir danken ewer frewntschaifft alczumal sere und wellen hin für euch vor unserm gnadigsten herrn dem künig dancken ewer frewntschafft und furdrung, dii ir uns in unsern nöten bewëist hat. Nu bitten wir ewer frewntschafft mit ganczen vleiz, ir wellet euch dar inne durch unsers gnadigstes herrn willen und unsers dinstes frewntlich beweisen und darzu tün dürch behaltung und beschirmung des hawses wider dy veïnt. Als wir mit ewern mitpurger Cunrat Mëindl geredt haben von etlicher phandt wegen, dy wir zu Nüremberg maynen verseczen, ir wellet in hinëin senden, damit er uns mit ewr hülffe gelt auf dy phandt macht auspringen, daz wir daz haws machten döster poz gespeissen und den gesellen umb iren dinst tün. Wenn ist, daz wir chain auf dy phandt machten auspringen, so lag uns gar hart auf dem haws, daz daz dem ganczen lande und auch andern landen zu schade wër. Und ist, daz sy besorgten, daz dy phandt von unsern gnadigsten herrn dem künig oder von andern würden aufgehalden, dy darauff lihten, daz wellen wir in vergwissen und verbriven und verpurgern mit unserm gnadigen herrn marggraffen von Brandenburg und mit uns selben und andern herren, daz sy dar inne chain hinderung sollen haben, sunder daz gelt redlich beczalen. Daran beweist ir unserm gnadigsten herrn dem künig sunderlichen dinst und wir daz umb euch gern ymmermer wellen verdinen und vor unserm gnadigsten herrn danken. Geben zu Pilzen an sunabent vor Martini anno et cetera cccc°xxii°.