Wir Bürgermeister, Rathmanne vnd gantze Gemeinde der alden vnd newen Stat Prage, bekennen mit disem Briue offenbar vor allen Lewten, das wir uffgenommen haben vnd nehmen in krafft dises Briffes eynen rechten cristenlichen friden, biss zu sente Jorgen tage negst zukommende, mit der allerdurchlawchtesten fürstin vnd frawen frawen Sophian Behemische Konigynne, vnd mit den Erwirdigen herrn h. Cunraden Ertzbischoffen zu Prage, h. Jan bischoffe zu Lewtomissel, vnd mit den Edelen herren h. Czenken von Wartenberg genant von Wessel, deme obersten Pregischen Burggrafen, h. Jonen von Michelszberg, h. Alschen von der Duben obirsten Kammerer der Lanttafel, h. Vlreichen von Rosenberg, h. Wilhelm von Hasenburg, h. Jon vom Newenhuse, h. Petern von Sternberg, h. Hincken genannt Hlawatz von der Dube, vnd mit allen andern herren vnd amptmannen, die vns widersagt haben von geheisse des allerdurchleuchtesten fürsten vnd h. h. Sigmunden Römischen Könige, zu allen Zeiten mehrer des Reichs, Vngerischen, Dalmatzken, Charwatzken konige etc. ader bey der allerdurchl. etc. Sophian Behmische konigynne, vnd mit allen den jren, ouch mit allen hofemannen vnd dienern seliger gedechtnusse des Behemischen koniges, die do mit geheisse der koniginne vnd neben den herren mit vns zweytrechtig wurden sein, domete mit dem huse zu Prage etc. allen Steten die vns entsaget haben etc. Bey vorlysunge vnser trewen vnd Ehren, vnd vorfallunge 50,000 f gr. guter sybereiner phennige etc. dem obgeschribenen konige etc. vnd die andere helffte 25,000 der koniginne etc. zu bezalen in zwey Monaten. etc.