Mein innigs gebete zuvor, allerliebsten herrn! Als ir unserm herrn von Waldsachsen verschriben habt von unsers gnedigen herzogen Johannsen geczewge und rayse wegen et cetera das hab ich wol vernomen und tun euch wissenleich, das wir noch von der rayse unsers gnedigen herrn genczleich nicht vernumen haben, denn dy des Closters gewisse botschefft pracht haben und auch gester zw Tachaw in der Stat sein gewesen, dy sagen eygenleich, das dy hussen abgeczogen sein und czihen das lant wider ein gein Behem. Dann ewern brief wil ich unserm herrn von Waltsassen zu stunden senden, und was der von der Raysse vernumen hat, oder noch horen wirdet, das wirt er euch eygenleich verschriben. Geben am Sand Anthonii tag anno et cetera XXXI.