Wier Albrech, von Gottes gnadenn herczog zw Ostereich, ze Steÿr, ze Kherdenn und ze Krain, margkraff zw Merherenn und graff ze Tirol etc., empietten dem edln unnserm lieben getrewenn Josten dem Hechten vonn Rosicz, unnsrn unndterkamrern ze Merhern, unnser gnad unnd alles guets. Alls dir wisentlich ist von der sum gulden wegen, die unns unnsr Judenn ze Merherenn auff sanndt Pauls tag conversionis unnd auff sanndt Jorgenn tag nagst khunfftig antzrichten sollen, habent die Judenn, die yecz hie gewessenn sind, zu erkhennen geben, wie maniger unnder in solch antzal, so in den geben wiert gebierenn, in berayttem geltt ausrichten nicht vermügenn, also daz sii darumb ire erb mussen verkhümern, unnd wie man in auch vil schuldig sey, des sÿ an gerichts hilff nicht mügenn bekhömenn, empholhen wier dir unnd wellen ernnstlich, daz dw mit denn erbern weÿssen unnsrn liebenn getrewenn, dem burgermaister unnd dem ratt ze Brun, bestellest, welich unndter Juden ire haÿsser ader erb verkauffen oder verseczenn wellen, das sÿ des gewalts haben Juden und kristenn zů verkhumernn. Wier mainen und wellen auch, welich inn gellten sollen und darauff sÿ zaÿgenn werden, daz man in vonn denselben gelten ein fürderlich recht lass widergeenn, damit sÿ unns die vorgenante sum gelts dester bas unnd furderlicher ausgerichten und betzallen mügen. Sunder begerenn wier an dich, das dieselben Juden beÿ recht unnd gleÿch werden gehalten, damitt sie wider die fraÿhaÿtt unnd gnaden, so sie von Remischen und zw Behem khünigen unnd auch margkrawen ze Merhern unnd unns habent nicht zerungen ader beschwert werdenn, darann begest dw unnsernn willen. Geben zu Wienn an sambstag nach sanndt Lienharts tag anno tricesimo tercio.

D(ominus) dux p(er) m(agistrum) hub(arum) B(erchtoldum) de Mang(e)n.