Mein gebet zcuvor, lieben herrn! Als ir mir verschriben habt in unsers Herrn von Waltsassen abwesen von des edlen Herrn Otten von Yleborg wegen und seinen brieff mit inbeslossen gesant, des dancke ich uwer weysheit und der gancz Convent zcu male sere, und ich bite uwer lieb und weysheit, das ir dem benanten Herrn von Ileborg von unsers Gocszhaus wegen schreiben wollet, das er ansehen wolle unsers Goczhauss nemlich scheden, die es dann enpfangen hat von den Hussen und andern und auch teglichen noch nympt, und welle die sache in guten ansten lassen piss uff unsers Herrn von Waltsassen zcukunfft, wenn wir hoffen, daz der in kurcz anheim kome, das welle ich und der Convent umb uber lieb mit unserm gebet gein got alczit williglichen verdienen. Auch schicke ich uch Herrn Otten brief hie inn wider beslossen. Datum Waltsassen am suntag vor Kathedra Petri anno et cetera XXXV^to.

Eingelegter Zettel: Aůch laz wir euch wissen, wy uns lantmansweis gesagt ist worden, wy unser genediger Herr der Romisch Kunig et cetera ganczen willen hab in daz lant gen Behem zu raisen in kurcz.