Vnser willig, freuntlich dinst zu allen czeiten, erber, weisen, lieben freunt vnd gunner! Wir lassen ewr erberkeit wissen, das die pösen keczczer, die feinde der heiligen cristenheit, aber mit irem posem fürsacz zu grosser verderbnus armer lewt grassen schaden getan haben in dem crays zu Prespurgk vnd haben gestern ingenomen die kirchen zu Sannd Jorigen vnd wissen doch nicht ir maynung, was sy hinfur tuen maynen ader wellen. In dem wellen wir dach vns müen, was ir maynung sein wirt, dy wellen wir euch auch verkunden. Auch sennden wir ewer erberkeit der newen czeittung in disem vnserm brief verslossen einen brief in eigenschaft, der vns gesandt ist worden auch in derselben aigenschaft mit denn erbern, weisen, dem burgermeister vnd dem ratt der stat Radisch. Dyselben newengir ganczlich in demselben brief wert verhoren vnd bitten euch mit ganczem vleis, ob vns icht nott geschah, zu widersten den obgenanten feinden vnd ewer erberkeit dorumb ermanen würden, ir ewr willige hilf darinn vns beweisen wellet; das wellen wir vmb euch verdïnen. Geben zu Prespurgk, an Sand Barnabas tag, anno domini M°CCCC°XXXIIII°. Richter vnd der ratt der stat zu Prespurgk.