Wir Sigmund, von Gotis gnaden Romischer keiser, zu allen cziten merer des Reichs, und zu Hungern, Beheim, Dalmacien, Croacien etc. kunig, bekennen und tun kunt offentlich mit disem brive allen den, di in sehen oder horen lesen, das uns die burgere und inwoner unsers marktes zu Kunigsperg, unsere lieben getruen, mit diemutigem flisse gebeten haben, das wir in und iren nachkomen und demselben markte Kunigsperg alle und igliche rechte, gnade, friheite, brieve, privilegia und hantvesten, in von unsern vorfaren, kunigen zu Behem, und nemlich en von dem allerdurchluchtigisten fursten, herrn Karel, Romischen keiser und kunigen zu Beheim, unserm lieben vater seliger gedechtnus und von uns gegeben sind, zu bestetigen, zu ernewen und zu confirmiren gnediclich geruchten. Des haben wir angesehen anneme und getrue dienste, die uns und der cron zu Behem die burgere und inwonere des egenanten marktes zu Kunigsperg oft und dicke getan hant, teglichen tun und furbas tun sollen und mogen in kunftigen zeiten, und haben dorumb mit wolbedachtem mute, gutem rate und rechter wissen in und iren nachkomen, burgern und dem markt zu Kunigsperg alle und igliche ire rechte, gnade, friheite, brieve, privilegia, hantvesten, die in von unsern vorfarn, kunigen zu Behem, und nemlich von dem egenanten unserm lieben vater seligen, keiser Carl und von uns gegeben sind, gnediclich bestetigt, bevestent, vernewet un confirmiret, bestetigen, bevestnen, vernewen und confirmiren in die von Behemischer kuniglicher macht in kraft dises brifs und seczen und wollen, das die furbas alle und igliche in iren artikeln, puncten, begriffungen und meinungen, wie dann die von worte zu worte lauten, craft und macht haben und das sie der ouch gebruchen und gerulich genissen sollen und mogen, von uns, unsern nachkomen, kunigen zu Behem, und sust von allermeniclich ungehindert. Und wir gebieten auch davon allen und iglichen unsern und der cron zu Beheim undertanen und getruen, und nemlich dem pfleger daselbst, der iczund ist und in czeiten wirdet, ernstlich und vesticlich mit disem brieve, das sie die egenanten von Kunigsperg an den obgenanten iren rechten, gnaden, friheiten, brieven, privilegien und hantvesten frubaser nicht hindern oder irren noch sie daruber dringen oder besweren sollen in dhain weis, als lieb einen iglichen unsere und unsers kunigrichs zu Behem swere ungnade sei zu vermeiden. Mit urkund diss brives versigelt mit unserer keiserlichen maiestat insigel. Geben zu Prage nach Cristi geburt vierczehenhundert jar und dornach im sibenunddrisigisten jare am nechsten mitwochen nach der heiligen drier kunig tage, unser reiche des Hungerischen etc. im funfczigisten, des Romischen im sibenundczwenczigisten, des Behemischen im sibenczehenden und des keisertums im vierdem jare. Ad mandatum domini imperatoris Petrus Kalde, prepositus Northusiensis.