Eugenius, et cetera, dilecto filio Iohanni, tituli sancti Petri ad vincula presbitero cardinali, salutem et cetera. Sedes apostolica pia mater recurrentibus ad eam cum humilitate filiis post excessum libenter se propiciam exhibet et benignam. Exhibita siquidem nobis nuper pro parte Iohannis de Hiellin, clerici coniugati Tornacensis diocesis peticio continebat, quod, cum olim quedam secta seu opinio damnata et heretica in partibus illis de novo exorta fuisset et multe persone huic secte credidissent et adhererent, exponens ipse diabolico spiritu deceptus prefatam sectam et opinionem ac eius errores, qui multi numero erant et de directo contra fidem catholicam et sanctam matrem ecclesiam eiusque sacramenta et ministros veniebant, tenuit et eis credidit, multasque alias personas utriusque sexus et pueros ac iuvenes in huiusmodi secta et erroribus instruxit et eos doctrinam huiusmodi secrete tamen docuit, multos preterea libros in vulgari Gallico scriptos, quos secum habebat et in quibus prefate hereses et opiniones continebantur, frequenter legebat, et aliis de dicta secta prefatos libros comodabat et exponebat, et dubia, que habebant, in eisdem libris interpretabatur; quodque postmodum, cum ex predicacione cuiusdam fratris ordinis fratrum minorum, qui contra tenentes talem sectam et opinionem predicabat, secta ipsa detecta et manifestata pluresque illius complices, sequaces et adherentes carceribus mancipati et eorum aliqui ignis incendio concremati fuissent, dictus exponens timens sibi propterea mortis periculum imminere, de patria sua fugit et ad partes Alamanie se transtulit, volens ad infideles hussitas sive Bohemos transire eorumque sectam, que utique in multis cum opinionibus, quas ipse tenebat, concordabat, tenere et eis tota intencione adherere, licet prohibentibus viarum periculis ad illos tandem transitum habere nequiverit. Interim vero, quia de premissis suspectus publice redditus fuit, pluries publice per edictum citatus, ut personaliter coram eius ordinario et inquisitore heretice pravitatis compareret, ut contumax per eundem ordinarium propterea excommunicatus et aggravatus et ut talis publice denunciatus extitit. Cum autem, sicut eadem petitio subiungebat, prefatus Iohannes in erroribus et opinionibus huiusmodi per annos quindecim vel circa damnabiliter permanserit, et ad cor reversus ac ad sedem prefatam propterea veniens personaliter cupiat ad dictam ecclesiam et eiusdem fidem cum humilitate redire, pro parte ipsius Iohannis nobis fuit humiliter supplicatum, ut ipsum ad unitatem ecclesie restituentes eum a premissis ordinaria auctoritate ceterisque excommunicationum sentenciis et aliis penis contra tales specialiter et generaliter per constitutiones et ordinationes apostolicas inflictis quibuscumque absolvi mandare de benignitate apostolica dignaremur. Nos igitur attendentes, quod ecclesia ipsa nemini contrito et penitenti vere redeunti fores misericordie claudit, circumspectioni tue per apostolica scripta committimus et mandamus, quatenus, si dictus Iohannes opiniones, sectam et errores premissos abrenunciare et fidei ac unitati et preceptis universalis ecclesie perpetuo et inviolabiliter stare et adherere voluerit, postquam opinionibus, secte et erroribus huiusmodi abrenunciaverit, ut prefertur, eum a sentenciis et penis predictis in eum premissa racione quomodolibet promulgatis, auctoritate nostra hac vice dumtaxat absolvas in forma ecclesie consueta, eumque prefate ecclesie et eius sacramentis restituas et reponas, iniunctis inde sibi pro modo culpe penitencia salutari et aliis, que de iure fuerint iniungenda et nichilominus omnem inhabilitatis et infamie maculam sive notam per eum premissorum occasione contractam auctoritate prefata penitus aboleas, non obstantibus premissis ceterisque contrariis quibuscumque. Datum Rome apud sanctum Petrum, anno incarnationis dominice millesimo quadringentesimo tricesimo primo, decimo kalendas maii, anno primo et cetera.