Wir Albrecht, von Gotes gnaden herczog ze Österreich, ze Steir, ze Keͣrnden und ze Krain, markgraf ze Merhern und grave ze Tirol etc., embieten unsern lieben getrewn Vͦlreichen dem Eyczinger, unserm haubtmann, dem burgermaister und dem rate zu Znoym, unser gnad und alles gůt. Uns hat Nachim der Jud ze Znoym an stat seinselbs und andrer Juden ze Znoym fürbracht, wie menigeͣr des brobst von sant Poltenperg und andrer herren holden denselben unsern Juden haben gelten sullen, ee wenn si sich gen Schattaw hinder den von Vettaw haben geczogen, und mainen nu der gnaden, die wir desselben von Vettaw leuten ze Schattaw haben getan, gen den egenanten unsern Juden von sölher irer alter geltschuld wegen, die si in vor habent schuldig beliben, die weil si dennoch under andern herren gesessen sind, zu geniessen, das uns umpilleich dunkhet, emphelhen wir ew ernstleich und wellen, wa si ew auf sölch holden und leut daselbs ze Schattaw von alter geltschuld wegen, die si unsern Juden ze Znoym vor habent gelten sullen, ee wenn si sich hinder den von Vettaw gen Schattaw geczogen habent, zaigen, daz ir in gen den und auch umb ander ir geltschuld, wo man in die schuldig ist, hilfleich und fürderleich seit, damit si der beczalt und ausgerichtt werden. Daran tůt ir unsern willen. Geben ze Brünn an sunntag nach sant Matheus tag, anno Domini etc. tricesimo sexto.

D(ominus) d(ux) in (con)s(ilio).