Sigmund von gotes gnaden Romischer kunig zu allen czyten merer des richs und zu Ungern, zu Behem etc. kunig.

Lieben getrewen. Ewern brief, den ir uns bii disem botten gesant habt, haben wir wol vernomen, und was ir uns dorinn geschriben habt, danken wir euch und merken auch sunderlich trewe und liebe, die ir allcziit zu uns getragen habt, und die ir uns noch bewiset und solicher eweir trewe wollen wir euch in allem gůte nymmer vergessen, und begeren, das ir dorinn beharret und nyemand erschrecken laszet, ob euch yemand ichcz furbringen oder schriben wurde, das wider uns were, als die Wiccleffen pflegen zu tund und laszet euch unsere liebe tochter sunderlich bevolhen sin und bewiset ir furdernůsz und gůten willen, wie ir mögt, und habt auch der stat gůte achtung. Das ist uns von euch allcziit sunderlich wol zu danke. Geben zu Weluar am mittwochen nach sand Martins tag, unser riche des ungrischen etc. in dem XXXIIII, des romischen in dem eylften und des behemischen in dem ersten jaren.